भइया से बोली भउजी

इक दिन भइया से बोली
भउजी करत के कंघी
इया साल त सईया देखा
लड़बय हमहू सरपंची

भइया बोले बोट न पउबै
नाहक होइ नामूजी
आँखि तरेरि भइया कइ
भन्नाय के बोली भउजी

मिली बोट कइसे न देखी
सोचेंन हयन सरल उपाय
चमकती साड़ी सेट पहिनब
हमजोरिन संग बागब गांव

नैनन कजरा जुड़ा म गजरा
ओठन पोटिकै लाली
चारि जने के बीच बइठि
पुनि मारब नयन कटारी

परी बोट जिन्हा सजि धजिकै
इस्कूले कय हम जाय
मतदान परभारीसे हसि हसि
अपने कैतिक लेब मिलाय

कइसेउ मइसउ जीति गयेन जो
तुहु कहउबय सरपंचपति
दांत निपोरे अब तकि बागेउ
लहि जाइहि तोहरउ घती

अधिकारीन क साथ मिलाउब
नाली रोड़ खूब बनबाउंब
रुपिया पइसा पास म होइ
सहर अपनउ बगला होइ

आंगन बाड़ी केर पंजीरी
दरिया अउ आबास
बड़े मनई जे गाँव के
जोरिहि हम से हाथ

जेतकी जोजना सरकारी
सगरिन से करब कमाई
सुनब केहू कै न करब ऊहै
जो हमरे मन म आई

एसी कार चढ़इक लेबय
छोड़ि फटफटी गन्दी
इया साल त सईया
लड़बय हमहू सरपंची