काखर पाछु म जाना हे

दु माडल हे देस के आघु
जेला चाहव चुन ल जी,
का करम कुकरम हे एखर भीतरी
आवव थोरकुन गुन ल जी,
गोड़ गिरव अउ माथा रगड़व
एक माडल ह कहिथे जी,
जनमानस ल भरमाये खातिर
आस्था के धार बहिथे जी,
जात पात बरिन ल मान के
खुदे नीच कहलावव जी,
बइठान्गुर के बात ल मानव
पेट ओखर सहलावव जी,
जाति धरम के पाछु म
आंखी मुंदा जावव जी,
हाथी कस ताकत ल अपन
छिन छिन म भुला जावव जी,
एक बरन ह राजा रहि
एक बरन ह रद्दा बताही जी,
एक बरन ह लुटही खसोटही
बाकी धार बोहाही जी,
हजारों बरस के पाखंड ह
जोर से फेर बोमियाही जी,
पुरखा हमर रोये रहिन हे जइसे
वोही दिन ह लउट के आही जी,
अब बात करन दूसर माडल के
ओमा का का होही जी,
कोन उड़ही अद्धर अकास म
कोन धरती म सुत रोही जी,
संविधान ह रक्छा करही
सबला सबल बनाही जी,
भाई बरोबर सब मिल जुल रहीं
समता के फुल ख़िलाही जी,
रानी के पेट ले नई निकलय राजा
हर कहुं राजा बन जाही जी,
चाल चलन म जे रइही समरथ
चुनई म चुन के जाही जी,
तिरंगा हमर फर फर फहरय
एला धियान म रखना हे,
संविधान के माडल सबले बढ़िया
एखरे सुवाद ल चखना हे,
अब तैं गुन, सुन, चुन कति जाना हे
कामा तोर ठउर ठिकाना हे,
दु माडल म कोन हे सुग्घर
काखर पाछु म जाना हे।

आप भी अपनी कविताएं, कहानियां, लेख, आदि राष्ट्रीय हिन्दी रक्षक मंच पर अपने परिचय एवं छायाचित्र के साथ प्रकाशित करवा सकते हैं, राष्ट्रीय हिन्दी रक्षक मंच पर अपनी कविताएं, कहानियां, लेख, आदि प्रकाशित करवाने हेतु अपनी कविताएं, कहानियां, लेख, हिंदी में टाईप करके हमें hindirakshak17@gmail.com पर अणु डाक (मेल) कीजिये, अणु डाक करने के बाद हमे हमारे नंबर ९८२७३ ६०३६० पर सूचित अवश्य करें …🙏🏻