बेटा शहर जात हे …

देवप्रसाद पात्रे
मुंगेली (छत्तीसगढ़)
********************

(छत्तीसगढ़ी बोली)

बेटा ल शहर के पिज्जा-बर्गर बड़ लुभात हे।
दाई हाथ के चटनी बासी अब नई मिठात हे।।
अपन गाँव-घर ल छोड़, बेटा शहर जात हे…

धनहा खार के नागर तुतारी अब नई सुहात हे।
बेटा घुमय शहर, ददा भिन्सारे ले खेत जात हे।।
अपन गाँव-घर ल छोड़, बेटा शहर जात हे…

नागर के मुठिया पकड़त म अब लजात हे।
हाथ म मोबाइल आँखी म तश्मा सजात हे।।
अपन गाँव-घर ल छोड़, बेटा शहर जात हे…

जहुरिया मन संग पार्टी म मजा खूब आत हे।
दाई ददा बोरे बासी, बेटा मुर्गा-भात खात हे।।
अपन गाँव-घर ल छोड़, बेटा शहर जात हे…

जांगर धर लिस ददा के, बइठे बइठे चिल्लात हे।
कान होके भैरा होगे, बेटा ल नई सुनात हे।।
अपन गाँव-घर ल छोड़, बेटा शहर जात हे…

सुरु होगय मुंह जबानी, धर के बात नई बतात हे।
बड़े से बात कइसे करना हे, संस्कार ल भुलात हे।
अपन गाँव-घर ल छोड़, बेटा शहर जात हे..

बेटा बसगे शहर म, दाई ददा ल अब बिसरात हे।
बेटा के सुध म दाई के, दिन-रात आँसू बोहात हे।
अपन गाँव-घर ल छोड़, बेटा शहर जात हे…

आपको यह रचना अच्छी लगे तो साझा अवश्य कीजिये और पढते रहे hindirakshak.com राष्ट्रीय हिन्दी रक्षक मंच से जुड़ने व कविताएं, कहानियां, लेख, आदि अपने चलभाष पर प्राप्त करने हेतु राष्ट्रीय  हिन्दी रक्षक मंच की इस लिंक को खोलें और लाइक करें 👉hindi rakshak manch 👈… राष्ट्रीय हिन्दी रक्षक मंच का सदस्य बनने हेतु अपने चलभाष पर पहले हमारा चलभाष क्रमांक ९८२७३ ६०३६० सुरक्षित कर लें फिर उस पर अपना नाम और कृपया मुझे जोड़ें लिखकर हमें भेजें…🙏🏻.